venres, 7 de maio de 2021

VIII Concurso Literario Mª Vitoria Taboada : o veredicto

O xurado do VIII Concurso Literario Mª Vitoria Taboada acordou por unanimidade outorgar os seguintes premios:

1º premio na categoría de poesía para ANDREA SEGADE ROZAS polo conxunto de poemas titulados, respectivamente, Alma ambulante”, “Soños” e “Aparencias; por conseguir expresar, coa precisión dunha eficaz linguaxe poética próxima ao sentencioso, sensacións universais coma o desconcerto ante o paso do tempo, e os medos e renuncias que nos xera a procura da felicidade.

1º premio na categoría de relato curto a ANA NOVO CUÑARRO polo relato "Natureza", porque consegue, en poucas liñas, construír un personaxe fascinante e abordar cunha brillante metáfora toda unha forma de entender a arte, ou a mesma vida.

Accésit na categoría de relato curto para VICENTE JOSÉ MOSQUERA VALERO polo relato titulado "A primeira visita do Camiñante do Abismo ao seu fogar", por articular en poucas páxinas (que prometen ulteriores desenvolvementos) un mundo fantástico orixinal, grazas ao manexo dunha rica linguaxe que crea unha atmosfera de intriga e que atende con detalle as percepcións e reaccións dos personaxes

O xurado considerou deixar deserto o premio de sketch teatral.

A entrega de premios terá lugar na Biblioteca do instituto, o 28 de maio, ás 11:20, nun breve acto, condicionado polas medidas anti-COVID-19.

A edición do libro cos textos premiados estará acompañada de ilustracións que realizará o alumnado do Bacharelato de Artes e que presentaremos no seu momento.

A seguir os textos premiados (o cartel da portada é obra de Sara Capiscol Pérez):

 

Moitos parabéns!

martes, 2 de marzo de 2021

Marela para "Senlleiras" e o 8 de marzo

Aproveitando a celebración do 8 de marzo (Día Internacional da Muller), editamos unha nova Guía de lectura, a nº 18, que se corresponde coa Marela nº 29, dedicada neste caso á novela de Antía Yáñez Senlleiras, que en palabras de Ana Novo Cuñarro (alumna do 1º de Bacharelato e integrante do Club de Lectura), nos presenta dúas historias que non coinciden na época cronolóxica, mais si na mensaxe a transmitir: a opresión do patriarcado na vida de calquera muller... Unha voz que nos recorda que non está todo ben e que a loita polos nosos dereitos como persoas continúa día tras día, na escola, no traballo, na casa. Así, a través dos pensamentos das dúas mulleres reflectidos ao longo da obra, amósasenos aquilo que a nosa atarefada vida social e a falsidade das redes sociais silencia cada vez máis. 

Lembrade que podedes descargala en PDF.
 

Para máis información visitade o Wikirmau.

xoves, 25 de febreiro de 2021

Día de Rosalía . Compartindo poemas

Poemas para compartir resultou todo un éxito de participación e as carteiras e os carteiros non daban feito a repatir os poemas rosalianos que unha gran porcentaxe de alumnado dedicou a aquela persoa da comunidade educativa que quixer: compañeiros/as, profesorado, persoal non docente...

Sen dúbida un día moi rosaliano, do que deixamos constancia gráfica, con vídeo e fotos de Daniel Santalla para DZ Dixital

A caixa do correo na que se depositaron as cartas poéticas

As cartas ordenadas por cursos, ou profesorado ou..., agardando ser repartidas

Carme, impulsora da actividade rosaliana

As carteiras e os carteiros antes do reparto

Entregando o correo para repartir
As cartas poéticas xa case están todas en mas das/dos carteiras/os
Carteiros polos corredores do instituto levando as cartas poéticas
Carteiras repartindo o correo
En plena faena
Lendo os poemas agasallados

Que emoción!







martes, 23 de febreiro de 2021

Día de Rosalía

Celebramos o Día de Rosalía coa actividade "Poemas para compartir". Que mellor agasallo que un poema de Rosalía!

E como complemento á actividade propoñemos:

1. Canto sabes de Rosalía? Xogo didáctico suxerido por GCiencia a base de preguntas sobre Rosalía. Animádevos, a ver se as atinades todas.

2. Ler o Manifesto da AELG no Día de Rosalía de Castro 2021.

3. Un paseo literario pola Compostela de Rosalía en Nósdiario.gal.

4. Rexurdimente : Vídeo que o grupo De Vacas vén de publicar nas redes sociais ás portas do Día de Rosalía e do 8M. Un encontro entre Rosalía (a nosa) e Rosalía (a outra) en base a "Malamente". A seguir o vídeo:

domingo, 21 de febreiro de 2021

Día da Lingua Materna sen TikTok pero con Valentín e Xela Arias

 No marco da celebración do Día da Lingua Materna non está de máis denunciar políticas lingüísticas baseadas no neoliberalismo lingüístico e no uso recesivo das linguas minorizadas e/ou minoritarias como a levada a cabo por Tiktok ao impedir o uso da lingua galega na campaña da Xunta #aculturasegue para fomentar o consumo cultural a raíz do impacto no sector da pandemia. E nin a actitude compensatoria do DígochoEu e quen de modificar a consideración de lingua de segunda para o galego.

A seguir o vídeo censurado por usar a lingua galega:

 

E para compensar, o fermoso relato (recuperado pola RAG) de Valentín Arias Xeliña fala galego, no que narra a experiencia como nena criada en galego da súa filla Xela Arias, á que se lle dedica este ano o Día das Letras Galegas.

Preme na foto para ler o relato.

Xela Arias e o relato de seu pai, Valentín Arias. Xulio Gil / RAG


 


sábado, 20 de febreiro de 2021

Día da Lingua Materna : Língu di gente antigo di Macau

Quen anda aí?

Lembramos a quebra na transmisión do galego no Día Internacional da Lingua materna.


Língu di gente antigo di Macau

Lô disparecê tamên. Qui saiám!

Nga dia, mas quanto áno,

Quiança lô priguntá co pai-mai

Qui cuza sä afinal

Dóci paiaçam di Macau?

                 (Poema en patuá macaense , crioulo de base portuguesa)

 

venres, 19 de febreiro de 2021

Día da Lingua Materna con Guadi Galego

 

Neste 2021, “as comunidades con lingua cooficial celebran o Día da Lingua Materna  outorgándolle o Premio á Promoción da Realidade Plurilingüe do Estado Español a Guadi Galego polo seu disco Immersion, que incorpora músicas cantadas en sete linguas do Estado, para o que conta con colaboracións chegadas de toda a Península, como Ivan Ferreiro, Ana Bacalhau, Lisandro Aristimuño, Clara Peya e Judit Neddermann, Andrés Suarez ou Mikel Urdangarin”.