mércores, 30 de xuño de 2021

Códice Rico e Códice dos Músicos : Libre acceso na Rede

A literatura galega e universal, a cultura, a historia, a música, a banda deseñada... están de parabéns, estamos todas e todos, xa que por fin poden ser consultados en liña o Códice Rico que recolle 193 composicións, con notación musical e 1.264 miniaturas;

e o Códice dos Músicos ou Escurialense, que inclúe 417 cantigas con 40 miniaturas e notación musical.

Son dous dos catro manuscritos das Cantigas de Santa María de Afonso X o Sabio que neste caso garda a biblioteca do mosteiro de San Lorenzo do Escorial, que mellor nova para celebrar o oitavo centenario de Afonso X. 
No seu momento, a Real Academia Galega solicitou a Patrimonio Nacional que ambos libros puidesen ter libre acceso na Rede, como xa ocorría cos outros dous códices, conservados na Biblioteca Nacional de España e mais na de Florencia. 

 

venres, 4 de xuño de 2021

Ao fío do encontro con Marcos Calveiro

 Xa podemos ler as reflexións feitas por alumnado de 1º do Bacharelato, ao fío do encontro co escritor Marcos Calveiro.

A charla con Marcos Calveiro foi de grande interese. Neste curso lemos dous libros del, Fontán e O xardineiro dos ingleses. En ambas as dúas obras houbo detalles que me foron difíciles de entender ao lelas, pero estas dúbidas foron aclaradas polo propio autor. A nivel máis persoal, Calveiro falou de problemas que había na súa comarca cando era mozo (e que seguen existindo, aínda que en menor medida) coma o tráfico de drogas. Isto é algo do que che pode falar moita xente, pero unicamente alguén que o viviu pode relatar fielmente o que era iso e a dor que lle causou a tantas familias.

Tomás Varela Rodríguez

O luns recibimos a Marcos Calveiro na nosa clase para desfrutar dunha charla que me resultou moi entretida, xa que foi ensinándonos imaxes dos lugares nos que ocorreran as historias que leramos, tanto en Fontán como n’ O xardineiro dos ingleses, e coas que tamén me dei conta de detalles que na lectura non apreciara. Ademais, contounos abertamente un pouco da súa infancia en Vilagarcía, e os problemas que alí había, sobre todo coas drogas.

Marta Simón Reboredo

Persoalmente pareceume moi entretida a visita do escritor Marcos Calveiro ao centro. Achegoume unha perspectiva diferente a súa charla, logo de ler as súas novelas Fontán e O xardineiro dos ingleses, xa que nos aclarou varios conceptos de ambos libros. Ademais, gustoume que nos ensinase fotos e falase sobre Vilagarcía e a conexión que ten co segundo libro, e mesmo coa súa vida persoal. Por outra banda, pareceume moi interesante a forma na que escribe os seus libros porque, como nos contou, empeza por elaborar un final e logo vai escribindo por partes sen un sentido concreto, para finalmente xuntalas todas nunha orde cronolóxica correcta.

Aroa Soto Areán

Hai uns días os alumnos e as alumnas de 1º A do BAC recibimos a visita de Marcos Calveiro, un  escritor de Vilagarcía que veu falarnos un pouco sobre dous dos seus libros,  “Fontán” e “O Xardineiro dos Ingleses”. Despois do que el nos contou sobre estas obras, eu destaco tres puntos que foron os que me chamaron máis a atención. Marcos Calveiro comentounos que el, cando comeza a escribir unha novela, non escribe a historia toda deseguido, senón que a escribe por escenas e logo xúntaas para así realizar a novela completa. Por outra parte, tamén me resultou estraño que as dúas novelas das que veu falar traten sobre temas reais que aconteceron aquí en Galicia. Xa por último o autor comentounos que el, á parte de ser escritor, tamén ten outros negocios que son os que lle permiten vivir, xa que dixo que  a escritura en galego non dá para vivir, e iso foi algo que me impactou moito, xa que ao publicar tantas boas novelas cría que se dedicaba soamente a iso.

Adrián Jorge Muíños

Cando ves por primeira vez a Marcos Calveiro e a súa mochila de peregrino, esta imaxe xa anticipa o percorrido histórico que nos vai realizar a través da súa vila natal, como xa fixera nos seus libros, demostrando de novo a habilidade de mesturar realidade, ficción e experiencias propias. Tamén nos ensinou a importancia de valorar o propio e descubrimos moitas figuras descoñecidas, animándonos a converternos nunha delas.

Brais Iglesias Montes

mércores, 2 de xuño de 2021

Encontro con Marcos Calveiro : o día

 O luns, 31, desenvolveuse o Encontro con Marcos Calveiro do alumnado de 1º do Bacharelato A, programado co gallo das lecturas de Fontán e O xardineiro dos ingleses

As reflexións de Marcos Calveiro sobre as dúas novelas foron seguidas con moito interese.
A seguir unhas fotos do acto:


 


sábado, 29 de maio de 2021

Encontro dobre con Antía Yáñez : os actos

 O venres, 28, tivo lugar o dobre encontro programado dos Clubs de lectura con Antía Yáñez, ao fío da lectura de Senlleiras por parte dos Club de Bacharelato e do profesorado e d'O misterio de Portomarín polo Club de 1º e 2º da ESO.

En ambos casos o encontro resultou ameno participando activamente os diferentes clubs, sobre todo os máis cativos que amosaron moita complicidade coa escritora.
A seguir unhas fotos do acto cos de Bacharelato e profesorado:


E cos máis cativos:



Posando co Club de lectura de 1º e 2º da ESO

 As fotos, como non, son de Carlos, iso si, coa colaboración de Uxía.



venres, 28 de maio de 2021

VIII Concurso Literario Mª Vitoria Taboada : acto de entrega de premios

 Hoxe tivo lugar a entrega de premios do VIII Concurso Literario Mª Vitoria Taboada, e por segunda vez o acto de entrega estivo condicionado polas medidas anti-COVID-19. Agardamos o próximo curso poder celebrar a entrega de premios co cerimonial que se merece.

No entanto, puidemos contar coa impagable presenza de Antía Yáñez que lles fixo entrega ás persoas premiados dos agasallos:

Lembramos as persoas gañadoras: 

1º premio na categoría de poesía, ANDREA SEGADE ROZAS polo conxunto de poemas titulados, respectivamente, Alma ambulante”, “Soños” e “Aparencias.

Antía Yáñez facendo entrega a Andrea do seu premio

 1º premio na categoría de relato curto, ANA NOVO CUÑARRO polo relato "Natureza".

 

Ana co premio entregado por Antía Yáñez

Accésit na categoría de relato curto, VICENTE JOSÉ MOSQUERA VALERO polo relato titulado "A primeira visita do Camiñante do Abismo ao seu fogar.

 

Vicente co premio recibido de mans de Antía Yáñez

Posando con Antía tras recibir os seus premios

Lembrar que o libro cos textos premiados está en proceso de elaboración, pendente das ilustracións do alumando do Bacharelato de Artes.

 


Encontro con Marcos Calveiro

 O luns, 31 de maio, terá lugar un Encontro co escritor Marcos Calveiro do alumnado de 1º do bacharelato A arredor das novelas Fontán e O xardineiro dos ingleses, e como ramo ás actividades conmemorativas do 17M.



 

xoves, 27 de maio de 2021

VIII Concurso Mª Vitoria Taboada : entrega de premios

O venres, 28, nun sinxelo acto condicionado polas medidas anti-COVID-19 terá lugar na Biblioteca a entrega de premios do VIII Concurso Literario Mª Vitoria Taboada.
Contaremos coa presenza de Antía Yáñez, que fará a entrega de premios, no marco da conmemoración das Letras galegas.